Wasiirka Arrimaha gudaha Hirshabeelle Maxamed Cali Caadle ayaa lagu eedeeyay inuu leeyahay mas’uuliyadda gargaarka loogu talogalay dadka ku waxyeeloobay fatahaadda Gobollada Hiiraan & Sh/dhexe, iyadoo ay soo baxeen inaan degmooyinka qaar la gaarsiin lacagihii loo qoondeeyay.
Xildhibaan Maxamed Yuusuf Colow oo ka mid ah Xubnaha Baarlamaanka Hirshabeelle ayaa sheegay in la musuqmaasuqay Lacag Kumanaan doolar ah oo loogu talagalay dadka ay saameeyeen fatahaadihii wabiga Shabeelle ee deegaanada Hirshabeelle sida degmooyinka Buuloburte, Mahadaay iyo Jalalaqsi, halka degmada Balcad aan weli waxba gaarin.
Xildhibaanka oo u warramay mid ka mida idaacadaha Muqdisho ayaa sheegay in Wasiirka Arrimaha gudaha Hirshabeelle uu madax ka yahay guddiga gurmadka isla markaana ay kula xisaabtami doonaan wixii musuq ah ee lagu sameeyo gargaarkaasi.
