Wararka laga helayo magaalada Muqdisho ayaa sheegaya in weriye ka tirsanaa warbaahinta dowaldda Soomaaliya uu ku dhaawacmay qaraxii maanta ka dhacay degmada Xamarweyne.
Weriye Maxamed Ibraahim Biibaaye oo ka mida saxafiyiinta ka howlgala warbaahinta dowladda Somalia ayaa la sheegay inuu la kulmay qaraxa ka dhacay suuqa Muqdisho Mall ee degmada Xamarweyne, waxaana dhaawaciisa la sheegay inuu yahay mid meel dhexaad ah iyadoo la dhigay mid ka mida isbitaallada Muqdisho.
Weriyaha ayaa qalliin lagu sameeyay isbitaalka Digfeer ee magaalada Muqdisho, waxaana la sheegay inay xaaladiisa degan tahay iyadoo lug iyo gacan dhaawac kasoo gaaray.
Qaraxa maanta ka dhacay magaalada Muqdisho ayaa waxaa ku dhintay in ka badan 10 qof, wuxuuna dhaliyay burbur xoog leh iyo qasaare isugu jira dhimasho, dhaawac iyo mid hantiyeed.
