Wararka laga helayo gobolka Sh/hoose ayaa sheegaya in ciidamada kumaandooska Milateriga Soomaaliya ee Danab oo taageero ka helaya ciidamo Mareykan ah ay weerarro kedis ah ku qaadeen saldhigyada Alshabaab ee Gobolka Sh/Dhexe.
Howlgalkan ayaa ka socda degaanada Basra, Buulo kuunto, Garasweyne, degaanka Daniga Baalow, oo dhamaatood ka tirsan Shabeelada Dhexe. Waxaana goobahaasi ku yaallay xarumo ay AlShabaab ku tababari jireen caruurta ay u diyaariyaan dagaallada.
Warar hordhac ah ayaa sheegaya in ciidamada huwanta ah ay qabsadeen saldhigyo dhowr ah, isla markaana ay jiraan qasaare xoog leh oo la gaarsiiyey kooxda Alshabaab, sida laga soo xigtay saraakiil ka tirsan ciidamada Xoogga dalka.
Degaandan ayaa dhinaca Galbeed ka xiga degmada Balcad, waxayna noqdeen saldhigyo laga maamulo kooxda Alshabaab ee weerarka ku heysta Gobolka SH/dhexe iyo Jidka isku xira Muqdisho iyo Jowhar.
