Madaxweynaha Puntland Mudane Siciid Cabdullaahi Deni oo uu wehliyo Senator C/raxmaan Faroola ayaa ku haray mgaalada Kismaayo, waxayna kulamo ka wadaan halkaasi, iyagoo maanta kulan la yeeshay odayaasha dhaqanka Jubbooyinka.

Kulan oo Madaxtooyada Puntland ay ku tilmaantay inuu ahaa is-xogwaraysi ayaa waxaa ka qeyb galay Nabadoonada iyo Odayaasha dhaqanka Jubbaland, waxaana Deni iyo Faroole ku wehliyey Gudoomiyihii hore ee Baarlamaanka Puntland Axmed Cali Xaashi, masuuliyiin kale, waxayna odayaasha ka dalbadeen inay taageeraan Axmed Madoobe oo aysan u debcin cadaadiska lagu hayo.

Madaxweyne Deni ayaa ku booriyey Isimada Nabadoonada iyo Wax-garadka Jubbaland inay kala shaqeeyaan Dowladda Axmed Madoobe xasilinta, xoreynta iyo nabadda degaanada Jubbaland, isagoo kula dardaarmay haldoorka Jubbaland inay garabsiiyaan Madaxweynaha dib loo doortay.