Guddiga Qabqabaabada Doorashada Guddoonka golaha Shacabka oo kulankoodii koowaad maanta yeesha ayaa iska dhex doortay Guddoomiye iyo xoghaye.
Guddigan oo ka kooban 10 Xildhibaan ayaa codeyn u qaaday xilka Guddoomiyaha oo ay u doorteen Wasiirkii hore ee Amniga Xildhibaan Cabdirisaaq Cumar Maxamed oo helay 5 Cod, halka xogheynta Guddiga loo doortay Xildhibaan Maxamed Abuukar Cabdi oo hore u ahaa Wasiirka Arrimaha Gudaha Koonfur Galbeed.
Qoraal uu soo diray Guddoomiyaha Guddiga ayuu ku sheegay inay sharaf u tahay in loo doorto Guddoomiyaha Guddiga Doorashada Guddoonka Golaha Shacabka, ayna si degdega u qaban doonaan doorashada si aan waqti kale loo lumin.
Guddigan ayaa si rasmi u gudaha gelaya diyaarinta Doorashada Guddoonka Golaha Shacabka oo ka kooban Guddoomiyaha Golaha Shacabka iyo labada ku-xigeen, iyagoo soo diyaarin doona jawdalka Doorashada Shuruudaha laga rabo mushariixinta.
