Jaamacadda Carabta ayaa Qaraar ka kooban 19 Qodob oo lagu taageerayo Soomaaliya kasoo saartay shirkii wasiirada arrimaha dibadda dalalka Jaamacadda Carabta ee magaalada Qaahira.
Qodobka afraad ee Bayaanka ayaa loogu baaqay in dalalka Jaamacadda Carabta ay dowladda Soomaaliya ku taageeraan xaqiijinta midnimada dhuleed, Badda iyo Hawada Soomaaliya, lagana hortago faragelinta lagu kala qeybinayo hawadeeda.
Qaraarka Jaamacadda Carabtay ayaa dalalka Jaamacadda Carabta ka mida ku booriyey inay fuliyaan balanqaadyadii hore ee kaalmada Soomaaliya oo bil waliba loo qoondeeyay in la siiyo lacag dhan 10 Milyan oo doolar oo lagu kabayo miisaaniyadda dowladda, iyadoo sidoo kale loogu baaqay inay taageero ka geystaan abaaraha laga cabsi qabo inay ku dhuftaan Soomaaliya.
