Iyadoo ay maanta dhaceyso doorashada guddoomiyaha Baarlamaanka Soomaaliya ayaa waxaa soo if baxay loolan adag oo ka dhex aloosmay maamul Goboleedyada qaarkood iyo dowladda Soomaaliya oo ku saabsan cidda noqoneysa Guddoomiyaha cusub ee Baarlamanka Federaalka Soomaaliya.

Kulamo u socday Madaxweynaha dowlad Goboleedka K/Galbeed Shariif Xasan Sheekh Aadan iyo madaxtooyada Soomaaliya ayaa fashil ku soo dhammaaday markii Shariifku diiday inuu taageero musharax ay wataan xukuumadda iyo madaxtooyada [Akhri Warkan].

Maamul Goboleedyada K/Galbeed oo xilkan leh, Puntland iyo Jubbaland ayaa si buuxda u taageeraya musharax mucaaradka oo noqday Xildhibaan Ibraahim Isaaq Yarow, waxaana isla musharaxan taageeraya kooxda Qabyo ee taageerayaasha madaxweynihii hore ee Soomaaliya Xasan Sheekh Maxamuud.

Doorashada guddoomiyaha Baarlamaanka ayaa soo shaac bixisay mucaaradka cusub ee Villa Somalia oo hadda si cad loo arkay, kaasoo ka kooban xildhibaanno iyo maamul Goboleedyo awood leh, waxaana dagaalka siyaasadeed oo soo socda lagu wadaa inuu labadan dhinac dhex maro.

Waxaa xusid mudan in Musharax Ibraahim Yarow uu ka tirsanaa xukuumadda Soomaaliya isla markaana ay u soo sharaxday xilkan, kana bixisay kharashka is-diiwaangelinta.