Madaxweynaha waqtigiisu dhammaaday Xasan Sheekh Maxamuud ee xilka sii haya ayaa maanta gaaray magaalada Kismaayo.

Socdaalka Xasan Sheekh  ayaa ah olole doorasho oo uu ku doonayo inuu ku kasbano xildhibaanada lagu soo doortay magaalada Kismaayo, waxayna tani ka dambeysay kadib markii musharixiin uu ka mid yahay Cumar C/rashiid ay booqdeen halkaasi.

Madaxweynaha Maamulka Jubba ayaa ku soo dhoweeyay magaalada si ka duwan socdaalkii Cumar C/rashiid, waxaana la sheegay in maanta magaalada ay ka dhici doonaan kulamo madaxweyne Xasan Sheekh la qaadanayo xildhibaanada labada gole ee lagu doortay magaalada Kismaayo.

Xasan Sheekh ayaa ka carooday hadal ka soo yeeray Ra’iisal wasaare Cumar C/rashiid oo xildhibaanada Kismaayo ku sugan u sheegay in loo baahan yahay isbedel lagu sameeyo madaxweynaha dalka isagoo ku eedeeyay inuusan lahayn aragti dheer, dalkana u horseeday dibu dhac.

Goobjooge.com