Waxaa weli socda rasaas goosgoos ah oo ka dhaceysa gudaha Hotelka Elite ee magaalada Muqdisho oo ay gudaha ugu jiraan dagaalmayaal ka tirsan Alshabaab.

Wararka ayaa sheegaya in ciidamada gaarka ah oo ka howlgalaya Hotelka ay dileen lab dabley ah, iyadoo laba kale ay weli ka dhex dagaalamayaan gudaha Hotelka, waxaana laga soo badbaadiyey dad isugu jira mas’uuliyiin iyo shacabka.

Dadka Hotelka laga soo badbadiyey waxaa ka mida milkiilaha hotelka C/llaahi Maxamed Nuur oo ah xildhibaan ka tirsan Baarlamaanka Federaalka, wuxuuna farriin uu soo dhigay barah bulshada ku yiri: “Dhammaan allah ha un naxariisto inti ku dhimatay weerarki galabta ay argagaxisadu ku soo qaaday shacab soomaaliyeed gaar ahaan Hotel Elite oo aan xilligaas ku sugnaa inta dhaawaca ahna allah bogsiiyo, waana caafimaad dhamaan ehel iyo asxaabta”

Dhinaca kale qasaaraha ka dhashay Weerarka Alshabaab ku qaaday Hotelka Elite ee xeebta Liido ayaa sii kordhay iyadoo meydad aan la aqoonsan ay yaallaan goobta qaraxu ka dhacay. Dhaawaca ayaa ka badan 40, iyadoo dhimashada ay sare u dhaaftay 10 qof.