Ra’iisul Wasaaraha ahna Wasiirka Arrimaha Dibadda Qatar, Sheikh Mohammed bin Abdulrahman Al-Thani ayaa xafiiskiisa magaalada Doha ku qaabilay Madaxweynaha Somaliland Cabdiraxmaan Maxamed Cabdilaahi (Cirro).
War kasoo baxay Wasaaradda Arrimaha Dibadda Dalka Qatar ayaa lagu sheegay in labada dhinac ay kulanka isku weydaarsadeen aragtiyo ku saabsan xaaladihii ugu dambeeyay ee Soomaaliya, muhiimadda ay leedahay in la taageero dadaallada lagu doonayo in lagu gaaro amniga iyo xasiloonida, iyo sidii kor loogu qaadi lahaa xiriirka iyo dhisida kalsoonida dhinacyada kala duwan.
Dhinaca kale war kasoo baxay Madaxtooyada Somaliland ayaa lagu yiri: “Cirro waxa uu si cad hoosta uga xariiqay in Somaliland ay tahay jamhuuriyad madax-bannaan oo 34-kii sano ee ugu dambeeyey iskeed isku maamulaysay, oo aan ka mid ahayn sooyaalkii lagu dhisayna qayb ka ahayn Maamulka Federaalka ee Soomaaliya” .
Safarka Madaxweynaha Somaliland ee dalka Qatar oo si weyn ay u buunbuuniyeen taageerayaasha Somaliland ayaa ah kii ugu horeeyay ee noociisa ah, iyadoo dalka Qatar ay ay caddeysay inay Somaliland u aqoonsan tahay maamul ka mida Soomaaliya.
