Ra’iisul Wasaaraha xukuumadda Soomaaliya Xasan Cali Kheyre ayaa kormeeray ciidamada gaarka ah ee Booliiska Haramcad oo dowladda Somalia u dirtay magaalada Dhuusamareeb oo gacanta ku haya xarumaha muhiimka ah ee magaaladaasi.
Cidamadan oo ah kuwa Booliiska ee sida gaarka ah u tababaran ayuu Ra’iisal wasaaraga sheegay inay yihiin ciidamo ka howl-gala meel kasta oo dalka kamid ah ee Qaranku u diro inay ka shaqeeyaan, wuxuuna faray inay sii xoojiyaan dadaalkooda Amniga Dhuusamareeb.
Ra’iisul Wasaaraha ayaa kormeeray xarunta lagu qabanayo shir-weynaha dib-u-heshiisiinta Galmudug iyo deegaannada ergada shirka ka qayb geleysa ay magaalada ka deganyihiin.
Ra’iisul Wasaaraha XFS ayaa shalay u yimid magaalada Dhuusamareeb dardar-gelinta dadaallada lagu dhammeystirayo qorshaha dhismaha hey’adaha dowladeed ee Galmudug iyo furitaanka shir-weynaha dib-u-heshiisiinta.
Dhinaca kale Ra’iisal Wasaaraha xukuumadda Soomaaliya ayaa soo tababar u soo xiray tababar u socday saraakiil ka tirsan guutada 15-aad ee qaybta 21-aad ee ciidanka xoogga dalka oo hore uga tirsanaa ciidamadii Ahlu suna. Saraakiishan ayaa la baray habka maamulka, kala sarreynta iyo xeerarka uu ku dhaqmo ciidanka xoogga dalka Soomaaliyeed.
