Ra’iisal wasaaraha Xukuumadda Soomaaliya Xasan Cali Kheyre ayaa magacaabay xil ku cusub dalka oo lagu sheegay Madaxa Unugga Isku Xirka Deeqaha, kaasoo ka shaqeyn doona arrimaha la xiriira Deeqaha la siinayo dalka.
Waxaa xilkan loo magacaabay Muxumed Xuseen Axmed oo la sheegay inuu yahay khabiir in muddo ah kasoo shaqeeyay Arimaha Gargaarka, waxaana Unugga Isku Xirka Deeqaha (Aid coordination unit- Acu) u taagan taabba gellinta iyo socod siinta hannaanka fullinta qorshaha Qaranka.
Xafiiska Ra’iisal wasaaraha ayaa sheegay in Unuga yahay isku xiraha deeqaha iyo taabbagellinta hannaan ay ku wada hadlaan Soomaaliada iyo deeq bixiya yaasha, kaasoo ka caawiya Dowladda hannaanka qorshaha Qaranka sida arrimaha xog ururinta iyo loo-jistikada.
Sidoo kale Unugan Isku Xirka Deeqaha waxuu qaban qaabiyaa shirar kala duwan oo qorshaha Qaranka lagu taabba geliyo sida Hannaanka Wadaagga ee Soomaaliya ( Somalia Partnership Forum), Sanduuqa dib u diska Soomaaliya ( SDRF) iyo Shirarka Tiirarka (Pillars), isagoo Dowladda ka caawiya isku xirka hay’adda dawladda & Gobolada iyo Daba galka Dhaqdhaqaha Deeqaha (Aid mapping Exercise).
Ra’iisal wasaare Kheyre ayaa si joogto ah u magacaaba Gudiyo iyo xubno la wareega shaqada Wasaaradaha xukuumadda, taasoo keentay inay is casilaan qaar ka mida wasiirada.
