Guddiga Maamulka Koonfur Galbeed ayaa shalay diiwaangeliyay musharrixiin u taagan lix kursi oo ka mida kuraasta Golaha Shacabka ee laga soo doorto Magaalada Baydhabo.
12 Musharax ayaa loo diiwaan geliyay lixda kursi, waxaana guud ahaan tartanka laga reebay xildhibaannadii hore ugu fadhiyey kursiga oo ay ka mid yihiin wasiir ka tirsan xukuumadda Xilgaarsiinta ee Ra’iisal wasaare Rooble iyo Musharax Shariif Xasan Sheekh Aadan.
HOP167: waxaa ku tartamaya Cabdisalaan Cali Cabdi iyo Cabdi Maxamuud Maxamed. Waxaana kursigan hore ugu fadhiyey Xuseen Maxamuud Sheekh Xuseen (Badni) oo ah wasiirka Howlaha Guud ee xukuumadda Rooble.
HOP099: Waxaa kursigan loo diiwaan geliyey musharixiinta Axmed Madoobe Nuunow & Cabdinaasir Ibraahim Aadan. Kursigan ayaa hore u ahaa qoonde haween, waxaana ku fadhiday Deeqo Xuseen Xasan oo meesha laga saaray.
HOP077: Kursigan waxaa ku tartamaya Maxamed Sheekh Cabdulaahi (Ciirow) oo ah Taliyaha qeybta 60-aad ee Ciidamada Milatariga iyo Cabdinaasir Cali Xasan Sheekh Maxamuud. Waxaa kurisgan hore ugu fadhiyey Isgoowe Deeroow Isaaq.
HOP168: waxaa ku tartamaya Luul Ibraahim Cumar, Nasteexo Axmed Nuur, iyadoo uu hore ugu fadhiyey Xasan Macallin Xuseen.
HOP186: Waxaa loo diiwaan geliyey Musharixiinta kala ah: Cabduqaadir Cumar Macalin & Cabduqaadir Aadan Cali; waxaana kursigan hore ugu fadhiyey Maxamed Xuseen Isaaq (Afarraale) oo meesha laga saaray.
HOP261: Waxaa ku tartamaya Saalax Shariif Sayid Cali iyo Ismacil Shariif Cali, iyadoo tartanka laga reebay xildhibaankii hore ugu fadhiyey C/qaadir Xasann Sheekh Aadan oo ah wiilka uu dhalay iyo aabihii Shariif Xasan oo laga hor israagay inuu tago magaalada Baydbaba.
