Madaxda Dowladda Somalia ayaa shaaciyey inay mushaarkooda bishan sii dhammaaneyso ee Oktoobar 2019 ay ugu deeqayaan gurmadka fatahaadda ka dhacday Gobollada Hiiraan, Bay iyo Gedo.

Madaxweyne Maxamed C/laahi Farmaajo, Ra’iisal wasaare Xasan Cali Kheyre, guddoonka labada aqal ee Baarlamaanka Maxamed Mursal Sheekh iyo Cabdi Xaashi C/llaahi ayaa la shaaciyey inay mushaarkooda bishan Oktoobar ugu deeqeen dadka ku waxyeeloobay gurmadka fatahaadda, iyadoo hore ay dowladda Federaalka ku bilowday sanduuqa gurmadka lacag dhan 500-kun oo Doolar, taasoo si weyn loogu dhaliilay.

Dadweyne is abaabulay, shirkadaha ganacsiga iyo qurbe joogta Soomaalida ayaa bilaabay inay lacago iyo taageero u ururiyaan dadka ku waxyeeloobay fatahaadda ka dhacday dalka, siiba magaalada Beledweyne oo inteeda badan ay biyihu qariyeen.