Inta badan wadooyinka Muqdisho ayaa maanta xiran kadib qaraxii weynaa ee gilgilay magaalada Sabtidii shalay ee 14-ka Oktoobar.

Ciidamada ammaanka ayaa celinaya gaadiidka, iyadoo heegan sare ku jira, waxaana cabasho ka timid mas’uuliyiin uu ka mid yahay Guddoomiyaha Gobolka Banaadir oo ku celceliyay baaq ah in dadka loo furo wadooyinka, baaqaas oo u muuqda inuusan fulin.

Saraakiisha ammaanka ayaa sheegaya in heegan sare la geliyay ciidamada iyadoo laga cabsi qabo baabuur sida qaraxyo kale, iyadoo isla shalay la fashiliyay gaari kale oo qarax siday kadib markii uu dhacay qarixii weynaa.

Wadooyinka xiran iyo gaadiidka loo diiday inay isticmaalaan ayaa dhaliyay xaalad kale oo dadka ay si weyn uga caroodeen tallaabooyinka ammaanka Muqdisho ee ku jirta baroordiiqda maalintii koowaad ee dadkii lagu laayay qarixii Isgoysa Zope.

Ciidamada ammaanka ee ku sugan wadooyinka ayaa ka amar qaata wasaaradda amniga, waxaana is qaban la’ howlaha sugidda ammaanka iyo rabitaanka dadka oo dareemaya inuusan jirin ammaan la sugo, halka mas’uuliyiinta ay ka digayaan inay jiri karaan weerarro kale.