Ra’iisal wasaaraha xukuumadda Soomaaliya Xasan Cali Kheyre ayaa ka hadlay sababta madaxweyne Farmaajo uga baaqday xaflada furitaanka Aqalka Sare.

Isagoo khudbad ka jeedinayey xafladda furitaanka kalfadhiga shanaad ee Aqalka Sare ayuu sheegay inuu madaxweyne Maxamed C/llaahi Farmaajo isaga usoo wakiishay furitaanka Aqalka Sare.

Ra’iisal wasaare Kheyre ayaa sheegay in madaxweynaha uu xaflada uga maqnaaday shaqo amni oo degdeg ah darteed, isaguna uu u soo wakiishay inuu ku metelo furitaanka Aqalka Sare.

Madaxweyne Farmaajo oo magaalada Muqdisho ku sugan ayaa su’aalo badan la iska weydiiyey sida uu u wakiishay Ra’iisal wasaare Kheyre, waxaana la ogyahay in labada aqal ee Baarlamaanka uu khilaaf ka dhaxeeyo, waana markii labaad ee furitaanka kalfadhiyada Aqalka Sare uu ka baaqsado madaxweynaha.