Kooxdii ugu horeysay oo tahriibayaasha ku sugan dalka Liibiya oo ahaa qaxooti ku sii jeeday Yurub ayaa la geeyay dalka Rwanda, kadib markii uu dalkaasi aqbalay inuu qaxootigaasi hayo.

Kooxdan oo ka kooban 66 qof oo qaxooti African ah oo laga soo qaaday dalka Libya, waxayna gaareen dalka Rwanda, iyadoo ay ka midd yihiin carruur iyo hooyooyin. Qaramada Midoobey ayaa sheegtay in kooxdan ugu horreysay ee muhaajiriinta ay ka mi dtahay hooyo soomaaliyeed iyo canugeeda oo 2 bilood jira.

“Haddiya, waa gabar yar oo Soomaali ah oo 2 bilood dhalan, waxay ku dhalatay xeryaha muhaajiriinta ee Libya, berito waxay kasoo toosi doontaa goob ammaan ah oo ku taal Rwanda iyada iyo waaliddiinteeda” ayay tiri UNHCR. Muhaajiriinta waxaa la geeyay xarunta Gashura oo dhacdo koonfurta magaalada caasimadda ah ee Kigali.

Qaramada Midoobey waxay sheegtay in ka badan 4,500 qof oo muhaajiriin ah oo ku sugan xeryo ku yaal Libya ay u baahan yihiin in si deg deg ah halkaas looga soo daabulo maadama ay noloshooda halis ku jirto.

Tallaabadan ayaa ka dambeysay kadib ballanqaad uu madaxweyne Paul Kagame sameeyey sanadii 2017, isagoo “hoy” ugu yaboohay dadka Afrikaanka muhaajiriinta ah ee dalka Liibiya loogu geysto xadgudubyo isugu jira dil, xadgudubyo kufsi iyo ku shaqeysasho qasab.

Horraantii bishan, Rwanda ayaa heshiis la saxiixatay Midowga Afrika iyo hay’adda qaxootiha QM ee UNHCR, ayada oo ogolaatay inay qaabisho qaxootiga iyo dadka magan-galyo doonka Afrikaanka ah ee ku xaniban Libya.

Dowladda Rwanda ayaa sheegtay inay isu diyaarisay inay qaabisho illaa 30,000 oo qof, inkasta oo qorshaha uu yahay in markiiba dib u dejin loo sameeyo 500 oo qof, si looga hortago in 12-ka milyan ee dalkaas ku nool ay dareemaan culeys.