Maxkamada Ciidamada Qalabka Sida ayaa Dil toogasho ah ku xukuntay Askari ka tirsan Ciidamada ilaalada Degaanka ee loo yaqaan Minishiibiyadda, kaasoo Degmada Xamar-weyne ku dilay Ganacsade danyar ah.
Ganacsade Marxuum Abuubakar Maxamed Nuurani ayaa 10-kii bishan lagu dilay degmada Xamarweyne, markii canshuur laga rabay lacag dhan 5 Kun oo Shillinka Soomaaliga, waxaana geystay Qaasim Ducaale Cabdi, kaasoo uu dhaliyey qeylo-dhaan badan.
Askarigan eedeysaaha ah Qaasim Ducaale Cabdi ayaa muddo 5 maalmood gudahood ah lagu horgeeyay, laguna xukumay dil toogasho, kadib markii madaxweynaha dowladda Federaalka iyo mas’uuliyiin badan ay ka hadleen in cadaaladda la marsiin doono askarigii dilka geystay.
Ehellada Marxuum Abuubakar Maxamed Nuurani oo ku sugnaa fadhigii Maxkamadda ayaa soo dhoweeyay xukunka Dilka ah ee lagu riday ninkii dilka geystay.
