Ra’iisal wasaaraha xukuumadda Soomaaliya Xasan Cali Kheyrre ayaa la sheegay inuu go’aan adag ka qadanayo talo soo jeedinta ku saabsan wax ka bedelka loogu yeeray inuu ku sameeyo Golihiisa wasiirada.
Xogta ay heshay Goobjooge.com ayaa sheegeysa in ra’iisal wasaaraha aanu wax isbedel ah ku sameyn doonin golaha wasiirada ee uu magacaabay, balse tixgelin siin doono talo soo jeedinta ka timid xildhibaanada ee uu soo saaray Guddoomiyaha Baarlamaanka Maxamed Sheekh Cismaan (Jawaari).
Talo soo jeedinta xildhibaanada ayaa la sheegay mid welwel ku heysa Ra’iisal wasaaraha iyadoo ay horeba u dhici jirtay talo soo jeedin noocan oo kale ah, balse aan saxaafadda lala wadaagin, lana siyaasadeyn.
Olole iyo dadaallo ay wadeen golaha wasiirada magacaaban ayaa meel fiican soo gaaray iyagoo ku kalsoon inay heli doonaan codka kalsoonida, lama oga waxa ay arrintaas ka bedeli doonto talo-soojeedinta.
Ra’iisal wasaare Kheyre ayaa sugaya madaxweyne Maxamed C/llaahi Farmaajo oo la filayo inuu dib ugu soo laabto dalka, si ay uga arrinsadaan kalsooni siinta xukuumadda iyo arrinta Baarlamaanka.
Goobjooge.com
